لا بدّ من كسر القيد.. لا بدّ من رفع الحجب Publiée à 09:09

اليوم دخلت للفايسبوك و عملت طلّة في مجموعة "أحرار مال 404" اليّ لمّت حتّى توّ 6083 عضو .. و لقيت فيها موضوع يدعو إلى مناشدة الرئيس للتدخّل و رفع الحجب .. كما تدخّل و رفع الحجب عن الفايسبوك وقت الّي "غلط عمّار و حجبو" من مخّو هكّيكا من غير ما يشاور حدّ..
و زيد لقيت مجموعة جديدة متاع مناشدة هاي هوني..

الحكاية هذه متاع المناشدة ولّيت نفدّ منها و نتيقر.. نحسّ روحي وضيع .. وذليل .. ولشكون عاد؟.. لشخص كيفي كيفو.. مواطن تونسي لا يزيد عنّ أيّ مواطن قدرا أو شأنا.. و علاوة على ذلك.. المواطن هذا أنا ساهمت في أنوّ يكون موجود في الكرسي الّي هو فوقو من خلال صوت أعطيتهولو أنا من جملت الّي صوّتلو (بكّل حرّة و ديمقراطيّة..) في الإنتخابات السابقة

يعني نذلّ روحي و أنا ألّي خلّيت روحي؟؟.. لا و الله لا نناشد عبد و لا نقرّق بمخلوق.. و الّي باش يعمل على شعبو مزيّة.. يخليّها عندو.

يا ناس ما ذلّنا عباد و الله.. نناشد.. و نبندر.. و نقفّف ., و لا نتغيّر

يا ناس.. طالبوا و لا تناشدوا .. يدنا العليا و يدهم السفلى... أحنا نحطّ أصواتنا في صناديق الإقتراع.. أحنا ألّي نحكمو.. الشعب هو الّي يحكم في تونس (الدستور قال هكّة)... و لذلك الشعب من حقّو يطالب.

أنا أطالب برفع الحجب و الكفّ عنه لما فيه ذلك من إساءة لتونس في المحافل الدوليّة و لما في ذلك من تضييق لأفق الشباب التونسي و حدّ لمصادر إطلاعه..أطالب بكسر القيد.. و أطالب بأن يكون ذلك من أولى أولويّات المرشحين للرئاسة .. و ضمن برامجهم الطموحة.. و صلب سياساتهم الحكيمة..

أطالب يا شسمك..

نطالب.. و بأعلى صوت

"لا بدّ من كسر القيد.. لا بدّ من رفع الحجب"

إلى السادة وزير الدّاخليّة و وزير النقل و وزير البيئة و وزير السياحة Publiée à 08:34

تحيّة وطنيّة.. أمّا بعد أيّها السادة الكرام.. أناشدكم .. بصفتي مواطن تونسي غيور على هذا الوطن.. أناشدكم بالقيام بزيارة إلى محطّتي النقل البرّي بباب عليوة (الجانب الخاص بالحافلات و كذلك الجانب الخاصّ بسياّرات اللّواج) للإطلاع على مدى تدهور الوضع بهما و للإيجاد حلول آنيّة لمشكلة الأوساخ.. و حتّى لا تكون هذه الدعوة مجرّد مناشدة.. فإنّي أقترح عليكم بناء سور على الأراضي المهملة و تلصيق لافتات و معلّقات تبرز المعالم اتاريخيّة و المواقع السياحيّة في تونس العاصمة و في تونس عامّة .. كتلك التّي وضعت بجوار الطريق السياّرة مثلا .. فالمحطّّة تعجّ بالسوّاح القادمين من الحمّامات و نابل لزيارة تونس و سيدي بو سعيد .. و من العيب أن تكون الزبالة و الروائح النتنة أوّل ما يلفت إنتباههم عند خروجهم من المحطّة

لا بدّ أن من إيجاد حلّ .. من أجل تونس يا سادتي الكرام

كليمة لعمار Publiée à 17:18

فرنسا .. وطردناها.. جاي إنت تسكرلنا في أفامنا و تعميلنا في عنينا يا واطي.. يجيك نهار.. يجيك نهار .. يجيك نهار .. برا أقر حماة الحمى يا جاهل

إذا الشعب يوما أراد الحياة فلا بدّ أن يستجيب القدر
ولا بد لليل أن ينجلي ولا بد للقيد أن ينكســر

Pub sur tn-blogs Publiée à 12:05