كيفاش؟ Publiée à 14:47

(Disponible sur antikor2.blogspot.com)

عسلامة

يظهرلي ما نزيدكم شيء كي نقول أليّ الجو موش بالظبط في الفضاء التدويني هالنهارات و هذا راجع لأسباب نعرفوها الكلّ.. التدوين ..كما كنت قلت قبل.. مهدّد .. و الخيارات موش برشة.. يا نبقى.. يا نندثر.. أنا إخترت أن أبقى .. والخطر الّي متخبّيلي في كلّ دورة مرحبا بيه..

إخترت أن أدوّن كما دوّنت و أو أعبّر كما عبّرت و أن أقول كما قلت.. ومايهمّني والو بما أنّي مرتاح الضّمير.. و ما يقلّقني شيء بما أنّي عارف روحي شنوّة و عارف روحي فاش نعمل و عارف روحي علاش نعمل في الشيء الّي نعمل فيه

للأسف.. موش النّاس الكلّ تعرف روحها فاش قاعدة تعمل .. فمّا ناس عندها نوايا طيّبة أما تعمل في أعمال خبيثة و مشبوهة.. في الحالة هذي الأعمال تلغي النوايا..و تولي الأعمال بالمخلّفات و موش بالنوايا .. لأنّ البشر يحكم على البشر بالأعمال.. الحكمة الإلاهيّة هي الي جعلت نوايا النّاس من الغيبيّات و جعلت للناس أعين و ألسن و ألباب و قلوب يستعملوها باش يميّزوا بين الباهي و الخايب..بأنفسهم من غير ما يأثّر فيهم حتّى مخلوق

لا موش درس هذا .. ما نسمحش لنفسي نعطي دروس.. و لكنّي متعجّب كيفاش في 2010 مازلنا نلقاو ناس تتحكّم في إرادة ناس و تسيطر على أفكارهم و تقودهم و تحرّضهم على هذا و ذاك .. في غياب تامّ لما يمكن أن أسمّيه "واجب الشكّ في ما يقول الآخر".. شيء يحيّر

متعجّب كيفاش في 2010 و في بلاد تفخر أنّها قرّات و وثقّفت و عملت الواجب و تفخر بأن الثروة الحقيقية و الوحيدة هي الثورة البشريّة.. في البلاد هذي.. نلقاو ألّي الشباب كيف يفكّر.. يلزمو واحد يقلّو فكّر هكّة أحسن.. و كيف يتكلّم.. يلقى واحد يقلّو شبيك تحكي هكّة.. و يجبروا أنّو "يراجع نفسو" إجبارا و كان ما فهمش روحو.. نورّيه كيفاش

للناس هذوما نقول.. أيّا هاني ندوّن و تو تشوفو كيفاش