الحبس للرجال يا سيادة الرئيس.. و إنت دليلك ملك Publiée à 14:55

سيدي الرئيس..
كنت كتبتلك رسالة في مدوّنتي هذي قبل.. كان ذلك يوم 7 نوفمبر 2007 و كانت وقتها الجموع و الأعداد الغفيرة من المنافقين و المنافقات يناشدون سيادتك للترشح لانتخابات 2009 .. في كل نشرة أخبار.. في كل مقال متاع جريدة "وطنية" كانت "النخبة" و ما كان يسمّى ب "الشعب التونسي" يناشدوا فيك باش تتفضّل و تعمل علينا مزية و تترشح لانتخابات 2009... وقتها كتبتلك رسالة و قلتلك ألي راني لو كان جيت في بلاصتك.. نخرج من قرطاج و ندخل للتاريخ

أما رساتي هذيكة عمرها ما وصلتلك.. موش كل شيء يوصل لسيادتك.. يوصلولك كان رسائل الشكر و الأمتنان و العرفان بالجميل.. و هذي موش غلطة البوسطاجي.. أما غلطتك إنت.. أي نعم غلطتك إنت.. لأن البوسطاجي مسكين ولد باب الله و يخاف من سيادتك.. عمرو ما كان يحترمك.. فقط كان يخاف من بطشك

كيفو كيف الأغلبية العظمى متاع الصّحفيين التوانسة الي كانوا يطبّلوا و يزكّروا و يشكروا و يمجّدو فيك و في سياستك و فكرك و فلسفتك الحكيمة.. ما كانوش يعملوا هكك باقتناع.. لا.. أبدا.. كانوا يا إما خايفين من بطشك يا إما بايعين أقلامهم لزبانيتك.. لأن سيادتك عند برشة زبانية.. و أنا نقول كانو بايعين رواحهم لفلوسك.. كيفهم كيفما برشة ناس

سيدي الرئيس

عام 2008 كيف قلتلنا أنها باش تكون "السنة الوطنية للحوار مع الشباب" و قلتلنا إجاو عبروا بكل حرية.. خليتك رسالة على "منتدى الحوار مع الشباب" و قلت وقتها كيفاش نحب تونس تولي.. و قلت الي يلزم الإعلام يتحرر و يلزم المواطن يكون حر و قلت وقتها ألي يلزمنا ماعادش نخافوا و يلزم نسمعوا و نحترموا ألي يقول "لا" كما نحترموا يقول "نعم" لأن ال "نعم" و ال "لا" الزّوز ينفعوا تونس و الزّوز يبنيو تونس.. الكلام الي قلتو وقتها في المنتدى عجب المشاركين.. أما عمرو ما عجب القائمين على الحوار.. القائمين على الحوار طفّاو الحكاية و فما حتى شكون وصل قالي إجى ولي عضو في التجمع لأنه مدرسة الوطنية الحقة.. يعني ما يكفيش أنهم ما فهمونيش فاش نحكي.. زيد سبوني من غير ما يفيقوا أنهم سبوني.. ما أبهمهم جماعة "المدرسة الوطنية" متاعك يا سيادة الرئيس.. و ما أبهم الي قرّاهم الوطنّية

اليوم نكتبلك رسالة.. و الشعب الكل يسبّ فيك و في والديك.. أي نعم..يسبّو فيك و في والديك.. و هذا بفضل نهار 14 جانفي.. من نهارتها ولاو فما رجال في تونس .. أي نعم
و ولاو عندنا صحفيّين زادة.. من نهار 14 جانفي و أحنا شايخين ب"الصحافة الوطنية الحرة و المسؤولة" الي خلّيتهالنا سيادتك و مشيت.. تتصوّر أنهم كل يوم يجبدو سيرتك من غير ما يمجّدوك و من غير ما يقفّولك و من غير ما يبندرولك؟؟ كنت تتصور يجي نهار و ما يلحسلك حد يا سيادة الرئيس؟؟ كنت تتصور عندنا صحفيين قويين لهاك الدرجة في البلاد؟؟ كنت تتصور ألي القنوات و الإذاعات "الحرة" يدوّروهالك؟؟ كنت تتصور ألي السبّان يجيك حتى من الناس ألي إنت و أنسابك ردّيتوهم "رجال من رجالات الإعلام" في قنوات و إذاعات عملتوها إنت و أنسابك باش تنوّعوا بيها مصادر ثروتكم و توفروا على أنفسكم أموال الإشهارات الي كانت شركاتكم و شركات أحبابكم تصرفها في القناة الوطنية و فرد مرة تمجدوا أنفسكم؟؟

على كل.. موش هذا موضوعنا

حبّيت نكتبلك ليوم و نقلك.. مازل ما فاتكش القطار يا سيادة الرئيس..

صحيح فما ظروف خلاّتك تفوّت فرصة الرّكبة نهار 14 جانفي.. أما القطار راهو مازال ما خرجش من المحطة.. الموطور يدور و ساعات الباب يتسكر و يتحل .. أما القطار مزال ما خرجش.. صحيح تعبّى و الشعب الكريم الكلّ شد بلاصة و الواقفين أكثر مالقاعدين و اللي مرسكين أكثر مالي مخلّصين.. أما مازال ما فاتكش الرّكبة في القطار يا سيادة الرئيس

أكيد سمعت أنهم قريبا باش يحلولك محاكمة عادلة؟؟ أكيد وصلتلك المعلومة ألي نهار 20 جوان باش يبدى ماراطون محاكمتك ألي فيها أكثر من 90 جولة.. و رغم هذا نقولك .. مازال ما فاتكش القطار

صحيح الدستور ألي كان عاطيك حصانة مدى الحياة تمّ تعطيل العمل به في إنتظار ينوب ربي بمجلس تأسيسي فيه رجال صحاح يعملوا دستور جديد نبنيو بيه جمهورية أصح من "جمهورية الغد" متاع سيادتك.. أما راهو القطار مازال ما فاتكش و الركبة مازالت ممكنة

سيدي الرئيس.. طوّلت عليك.. في الحقيقة حبيت فقط نقلّك ألي أنا في بلاصتك ما نحطش محامي يدافع عليا.. أنا في بلاصتك نعلن أني ندمت و تبت و مستعد نكفر على ذنوبي و مستعد نتحمل مسؤوليتي قدام قضاء بلادي و مستعد نشد الحبس في سجون بلادي .. لأني أنا في بلاصتك.. نحرق روحي و مانعيشش ذليل في قصور الناس و أولاد بلادي يلعنوا فيا و يسبو في باب و أمي.. أنا في بلاصتك نرجع فلوس الشعب ألي تحيلت عليه و سرقتهملوا برضاه و بدون رضاه .. لأني ما نسمحش لنفسي نزيد نوكل أولادي من فلوس حرام.. نخليهم جواعة و ربي يوكلهم من رزقو أحسن

أنا في بلاصتك.. نروّح.. نرجّع الفلوس.. و نشّد الحبس

الحبس للرجال يا سيادة الرئيس.. و إنت دليلك ملك